Një ngjarje e rëndë është parandaluar sot në Shkodër. Një 27-vjeçare ka tentuar të hidhet me 4 fëmijët në Lumin e Bunës, por fatmirësisht është penguar nga policia.

“Ndërhyrja e Policisë parandaloi një ngjarje të rëndë.

Tentoi të hidhej në lumin Buna, bashkë me 4 fëmijët e saj të mitur, falë ndërhyrjes së shpejtë nga patrulla e përgjithshme që patrullonte në zonë, pengohet 27-vjeçarja.

Menjëherë pas marrjes së njoftimit, rreth orës 14:15, se një shtetase po tentonte të hidhej në lumin Buna, bashkë me 4 fëmijët e saj, shërbimet e Policisë që patrullonin në zonë, kanë ndërhyrë duke penguar 27-vjeçaren, e cila po tentonte të hidhej në lumë, bashkë me 4 fëmijët e saj 7, 5, 3 dhe 1 vjeç.

27-vjeçarja dhe fëmijët e saj u shoqëruan në ambientet e Komisariatit të Policisë Shkodër.

Grupi hetimor vijon punën për sqarimin e rrethanave të rastit.”, njofton policia.

Ju kujtojmë se pak kohë më parë një nënë u vetëflijua me tre fëmijët e saj duke u hedhur nga Lumi Buna, për shkak të konflikteve që kishte me bashkëshortin./K.C/dritare.net