Shtetasja amerikane Tracy Shannon Lyn, e cila prej katër vitesh jeton në qytetin Bar të Malit të Zi, ka denoncuar në polici se vajza e saj e mitur, Zynlee Ryan është rrëmbyer nga babai i saj Thomas Hollenbeck.

Sipas Shannon Lyn, ish-bashkëshorti i saj ka kaluar ilegalisht kufirin malazezo-shqiptar me vajzën e tyre gjashtëvjeçare.

“Jam njoftuar përmes Ambasadës Amerikane në Podgoricë se i ati ka kërkuar pasaportë për fëmijën në Ambasadën Amerikane në Tiranë”, shprehet si fillim Shannon Lyn për “Primorski Portal”.

“Në Mal të Zi janë duke vazhduar procedurat gjyqësore lidhur me kujdestarinë e vajzës sonë. Gjykata ende nuk ka dhënë një vendim përfundimtar. Vitin e kaluar, në shtator, gjykata e lejoi Thomasin të shihte vajzën tonë dy herë në javë, të martën dhe të premten nga ora 16:00-21:00.

Këtë të drejtë ai filloi ta përdorte vetëm në qershor të këtij viti. Ka ndodhur që ai është vonuar, por ka deklaruar se këto janë arsye objektive, si bllokim trafiku etj.

Deri mbrëmë ai ka njoftuar gjithmonë me telefon. Mirëpo, mbrëmë kur nuk e solli fëmijën, e telefonova, por telefoni i tij ishte i fikur. Gjatë natës pas orës 22:00, shkova në Qendrën e Sigurimit të Bar dhe raportova se fëmija nuk ishte kthyer në shtëpi. Isha shumë e shqetësuar. Kisha frikë se mos e kishte rrëmbyer. Fatkeqësisht, kjo u konfirmua sot në mëngjes”, përfundoi Lyn.

Sipas saj, Ambasada Amerikane në Tiranë u konfirmoi kolegëve të tyre në Podgoricë se e kishin parë fëmijën dhe se ai dukej mirë fizikisht, teksa kjo e fundit raportoi gjithçka në polici dhe Interpol.

Interpolit i takon të urdhërojë Ambasadën Amerikane në Tiranë që të kërkojë ekstradimin e fëmijës gjashtë-vjeçar te nëna në Mal të Zi.

Në deklaratën e saj në polici, Shannon Lyn deklaroi se Thomas Hollenbeck ishte dënuar për disa vepra penale.